Ñalawma Deftere Pulaar: Pr. Abubakri M. Lam Yeenaama Kuɗol Kaŋŋe!

Ñalawma Deftere Pulaar ko Joljole ɗe Lewlewal Group Communication yuɓɓinta ngam ruttude teddungal fayde he wiɗtiyankooɓe e winndiyankooɓe Pulaar. Ko hikka woni laawol ɗiɗiɓol ko ɓe njuɓɓini oon ɗoon ñalawma. Waɗaa ko ñalnde 21/12/2019 to wuro ene wiyee Siñcu Daŋɗe he nder Falnde Podoor,

diiwal St.Louis Senegaal. Ñalawma oo teddiniraa ɗum ko ganndo Afriknaajo ŋana; pullo paarnortooɗo Pulaar, yiɗi ɗum kadi gollanii ɗum ko ɓooyde majjinta,oon woni porofesoor Abubakri Muusa Lam.

Aboubacry Moussa Lam, so en mbinndirii no woowra ni, jibinaa ko 1953 he wuro ene wiyee Siñcu Daŋɗe diiwal Halayɓe, leydi Fuuta Tooro. Daartiyanke panniiɗo he Kemityeewal (Egyptologie), Abubakri ko almuudo Seek Anta Joop mo o jooɗtii he jappeere mum kadi o jokki darnde mum ngam haɓanaade ubbitde daartol Afrik ɓooyma e jokkondirde Afrik hannde e hanki mum paarnorɗo.

Porofesoor Abubakri Muusa Lam, ko winndiyanke belɗo kuɗol; o wallifiima defte keewɗe he ɗemngal Farayse ɗi omo hollira heen dalillaaji laaɓtude wonnde pinal Misra (Egypt) ɓooyma ko pinal ɓaleeɓe kadi ngaal pinal batteeji mum ene tawee haa jooni he nder ɓaleeri Afrik kala. He deftere makko De l’origine égyptienne des Peuls, omo hollira heen wonnde Fulɓe ummii ko Misra kadi e lawbi mum en fergo haa njettii daande maayo Senegaal kadi kaylitii payti fuɗnaange.

Yoga e binndanɗe makko ene njowtii he ferngooji ɓooyɗi ummoraade daande maayo Niil fayde he nder-ndereeri Afrik haa teeŋti e Worgo Sahara. He ɗeen binndanɗe omo huwtoroo karallaagal ɗemɗiyankaagal ngam hollirde jiydigal hakkunde ɗemɗe Firawna en ɓooyma e ɗemɗe ɓaleeri Afrik, teeŋtinoon he ɗemɗe Senegambia, ko wayno Pulaar, Seereer e Wolof.

Abubakri, ko jiɗɗo Pulaar kadi kiranoowo ɗum mo hono mum weeɓaani e nder annduɓe Fulɓe Senegaal. O wallifiima defte keewɗe e ɗemngal Pulaar ko wayno: Paalel Njuumri; Sawru Ganndal; Fulɓe Gila Héli-e -Yooyo haa Fuuta Tooro. Yanti heen kadi binndanɗe makko ene keewi he jaaynde Lasli\Njelbeen.

He nder oon ñalawma, o rokkaama njeenaari “Kuɗol Kaŋŋe” (Plume d’Or) sabu ballal makko he ƴellitaare pinal aadee rewrude he ubbitde gannde nafooje ɗe ene seedtina he binndanɗe makko keewɗe e defte makko bejaaɗe ɗoon he ndeen ɗoon ñalnde. Ngaal teddungal waɗaa ko he tawtoreede banndiraaɓe makko enɗam, gollidiiɓe makko, e denndaangal jooɗaniiɓe laamu Senegaal he diiwal he kala. Kono kadi e tawtoreede ngenndiyankooɓe Fulɓe heewɓe e jaayndiyankooɓe ɗemngal Pulaar.

Defte Porofesoor Abubakri Muusa Lam wallifii he ɗemngal Farayse


  • Les chemins du Nil: les relations entre l’Egypte ancienne et l’Afrique
  • De l’origine égyptienne des Peuls.
  • La fièvre de la terre.
  • Le Sahara ou la vallée du Nil?: aperçu sur la problématique du berceau de l’unité culturelle de l’Afrique Noire.
  • L’affaire des momies royales: la vérité sur la reine Ahmès-Nefertari.
  • Le triomphe de Maât.
  • L’unité culturelle égypto-africaine à travers les formes et les fonctions de l’appui-tête.

One comment

Addu Yiyannde ma

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s

This site uses Akismet to reduce spam. Learn how your comment data is processed.