Binndi Pulaar

Kala ɗo neɗɗo lemii e taariindi walla neesu (nature) so o ndaartindiima no moƴƴi walla o luggiɗiniima heen miijitogol makko, ma o yiy heen walla o tawa heen kaawise walla kaawniiɗe. Nde tawnoo huunde kala ene moofti sirlu, sirlu goodegol majjum kono kadi sirluuji guurgol majjum walla mbiyen pirfirli keddogol majjum. Ɗiin sirluuji ene kollira njuɓɓudi cañiindi, ndi ene teeŋtina taweede caggal ɗiin sirluuji, junngo geno karallo, ñeeñɗuɗo cañoowo ndiin njuɓɓudi, so tawii kay ko wonande goongɗinɗo goodaangal oon geno.

Kono haysinno ko mo hakkille mum ooñorii e sikkitaade goodaangal geno gooto tagɗo (puɗɗuɗo) kala goodal ne, o daɗataa e yiyde njuɓɓudi neesu (nature) mooftunɗi sirluuji ɗi kala nde kuñtanaɗen heen gootel eɗen mugee ngam kaawise, kono kadi eɗen keɓa heen hirjo e yiɗde ɓeydaade asde mbele ma en njetto ɗaɗi ɗiin sirluuji.

Kono denndaagal terɗe goodal peeñinooje njuɓɓudi neesu e sirluuji mum, mbele won heen ko ɓuri neɗɗo wonde kaawise? Nde tawnoo aadee he muulngo mum, o wayi ko hono no adunayel tokasel ni. Hono no leydi walla mbiyen ɓakkere ni, ɓanndu aadee ko ɓakkolinndu, ko ndu wulndu no wolkaaji dulɓittoɗi ni; ndiyam e ƴiiƴam ena doga he nder makko hono no maaje e caaɗli baltooji ni, he ɗaɗi e tekteki (tetteki) guurnooji terɗe makko no kala puɗe ni. Ngaandi aadee wonaa tan motoor tamɗo caaynol kala ɓosanɗe makko, kono kadi ko ndi resirdu ɗo ene moofta kala co’anɗe makko. He yeruuji daɓɓi tan, so en paami, neɗɗo ko huunde toownde he nder nooneeje goodal. Kono oon aadee wonaa garɗo tan ene ardi e timmal mum, alaa. O fuɗɗorii ko he waasde woodeede, caggal mum o woodaa he lohre. Ko he oon waylo-waylo timmal makko heɓaa. Ko ngaal goodal e oon waylo-waylo Ceerno Aamadu Sammba Demmbele ɓurɗo lollirde DAS, yiɗi yeewtande en he nder ndee deftere makko yaltunde ko ɓooyaani.

Deftere ndee e loowdi Mum

Neɗɗo, hono no mbiyɗen ni, tagaa ko he waylaade. So ceerno Mammadu Saalif Mbaay haalaniino en he deftere mum, “Cowagol e Kosamnɗinngol”, holno aadee fuɗɗortoo gila nde woni toɓɓere kañam ene wayloo haa o wonta tiggu o jibinee, Ceerno DAS kanum ko he tiggaagu fuɗɗorii. Ɗuum woni gila tiggu oo ene he ngonka mum ka o inniri “kawñitanɗe gume” haa yetto kellifuya. So tawii wallifiyanke gadano oo haalatnoo ko he guurɗeyeewal (biologie), DAS kanum haalata ko he ganndal peskelooji (psychologie), walla ganndal aadee fittiyaagal, hono no o inniri ɗum ni.

Deftere ndee haalata ko mawnugol suka e mahngo neɗɗaagu aade. E nde feƴtoo (feccoo) he lowe tati teskinɗe, ɗeen ngoni, a) tuggude gila e tiggaagu e boobaagu haa e ƴellitagol mum kuuɓtinngol; b) cukaaku gila he nehdi mum haa e jikkinde suka; c) sahaa joljole. Ɗuum woni tuggude e waylowaylooji joloowo haa yettii farweende jolɗo, haa heɓa sababuuji kellifuya.

Woni sabaabu winndude mo ndee ɗo deftere, Ceerno Aamadu Sammaba Demmbele wiyi en: “ Ko ngam rokkude denndaangal jannguɓe pulaar fartaŋŋe janngirde ngal gannde goɗɗe e alɗin’de humpito maɓɓe to bannge gannde tabitinteeɗe.”

Deftere ndee muulaa ko he ballal Miijorde Fulɓe Winndere, ko goomu denndinɗo annduɓe fulɓe heewɓe seertuɓe fannuuji, pelle pulaar, e hatanteeɓe leñol ngol fottitooɓe he nder lowre whatsapp, ngam daɗɗude pewje e hol no leñol Fulɓe yahrata yeeso.

Wallifiyanke O:

Ceerno Aamadu Sammba Demmbele jibinaa ko he hittande 1966 to wuro Jowol he nder Fuuta Tooro (Muritani). Caggal jaŋde leslesre e hakkundeere o yahi duɗal jaaɓihaaɗtirde o janngi toon haa o dañi seedanfaagu makko heɓindo (maitrse) he ganndal aadee he fannu pine leñɗi.

Ko o jannginoowo Feliyankaagal (philosophie) he duɗal laamuyeewal tolno hakkundeejo; ko o kebloowo kadi he duɗal safrooɓe e ŋarwinooɓe renndo e fannuuji, ganndal renndo e fittiyaagal e pinal leñɗi.

Ceerno DAS ko yimiyanke pulaar kadi winndiyanke. O wallifiima ko heewi hayso tawii suwaa muuleede.