Ɗemɗe ngenndiije : jannginoowo-biɗtoowo ina nodda he politik jaŋde ɗemɗe ngenndiije kuuɓtodinɗo.
Dakar, 24 Duujal (APS) – Porofesoor Moussa Sagna, jannginoowo e biɗtoowo ko fayti he coñce jerondiraaɗe (littérature comparée ) to duɗal jaaɓi haaɗtirde Cheikh Anta Diop to Ndakaaru (UCAD), eeriima fayde dawrugol ɗemɗe ngenndiije udditaningol mo woni kala, wonndude kadi he miijtaade no feewi, o wiyi wonde suɓaade ɗemngal ngenndiwal (lawakeewal) ngam wonde ɗemngal laawɗungal e nder leydi Senegaal ko heñaare.
“Ene woodi ngeɗe potɗe adaade hurmeede tawo ko adii nde wiyetee yoo gootal e ɗemɗe ngenndiije suɓe waɗee lawakeewal. En cuwaa tawo ɓetde dawrugol jaŋde ɗemɗe ngenndiije ɗee no feewi, saka eɗen miijo baylugol.” Biɗtoowo o wiyi e nder batu yuɓɓinaangu to Grand Théâtre National, ngu tiitoonde mum wonnoo : ” Dowla e ɗemɗe mum ngenndiije ” .
Wonande Mr. Saañaa, Farayse ina jokki e tabitinde hoore mum e nder nguurndam ñalnde kala yimɓe Senegaal, kono ɗum addantaa ɗum en waɗde ɗemngal Wolof walla ɗemngal ngenndiwal goɗngal ngam wonde mbaɗtaari.
“Yimɓe njaɓataa wonde Wolof ina fawee e dow mum en, no ɓe mbaawiri haɓaade fawaade e Farayse nii”, o wiyi. He wiyde Jannginoowo toowɗo o, haani kay ko: « mahde politik ɗemɗiyankeejo baawɗo rokkude mo woni kala janngude, winndude e haalde e ɗemngal mum ».
O jeertinii kadi, “ kala eɓɓaande waawnde bonnude nanondiral renndo e nuskude won e leñɗi ɗemɗe. E wiyde makko «keewceeral ɗemɗe Senegaal ina hollita ngalu pinal mum».
“Ɗemngal kala ina jogii natal pinal potngal reeneede. Ƴellitaare pelle ɗemɗe ina foti reeneede ngam hisnude jam e jokkondiral ngenndiwal”, o teeŋtini.
Joɗnde ndee yuɓɓinaama e ballondiral e winndiyanke-biɗtoowo biyeteeɗo Ousmane Lo, hawriti toon ko annduɓe e fanniyankooɓe heewɓe ngam yeewtidde e geɗe jowitiiɗe e kuutoragol e ngonka ɗemɗe ngenndiije e nder leydi Senegaal.
Sewnde: APS
Binndi Pulaar 