Binndi Pulaar

Ñalnde Aljumaa/Mawnde 23 Morso, 2021 maa fijooji Olympic 2020 (pijirlooji Olimpik) uddiit to Tokyo lesdi Japon. Eɗen nganndi ɗuum fotiino waɗde gila rawane, 2020, kono sabu reentaade mboros Koronaa wirisi oo addanino ɗum yoweede. Fotde jonte ɗiɗi pawɗe (haa 8 Juko) leyɗeele aduna ɗee kala ene kawra ngam waɗɗe pijirlooji coftal ɓalli.

Ko ɗum kawrital winndereyeewal ngal, eɗen mbaawi wiyde, leñɗi aduna ɗii kala walla kam ko ɓuri heewde e mum en ene tawtoree. He 2016 to Rio de Janeiro (Riyoo de Janeyro) eɗen ciftora, Huley Bah mo Muritani ene tawanoo e dogatnooɓe 800m. Hikka ko Rugi Jallo ( Rougui Diallo) mo Leydi Farayse woni ɓiy Pullo jogorɗo tawtoreede.

Rugi Jallo ko jibinannde Farayse, jibnaaɓe makko iwdi mum en ko Fuuta Jalon leydi Lagine. O jibinaa ko 5 Colte/Fevrier 1995 to Nice Farayse. O waɗata ko fannu coftal ɓalli biyeteeɗo “Diwe tati” triple saut. O adii dañde medaay makko dowrowo (kaŋŋe) ko he 2014 he kawrital World Junior in Athletics to wuro ene wiye Eugene dowla Oregon He nder Dowlaaji Dentuɗi Amerik. Ndeen diwe makko ɓetaama 14,24; 14,44 e 14,20 he ballal henndu 3.3m/s. Hayso ɗiɗi gadane ɗee njaɓaaka sabu ballal henndu ngal heewde, tataɓal ngal rokkii mo daɗtaade ɓetooji (record) makko ɓennuɗi kadi e waɗdemo jogiiɗo ɓeto ɓurngo toowde he nder sukaaɓe Farayse. Caggal mum ko ñalnde 14 Korse 2017 o arti he dow podium fijooji hakkundeleyɗeele, kono ndeen o ƴettunoo ko medaay jaka (bronz), wonno ko he sampiyonaaji Orop Yaakoraaɓe (espoirs) to Bydgoszcz to leydi Poloñ.

So tawii Rougui Diallo ko yaakaare Farayse leydi makko nde o ɗaminii suutoyde araaray mum hakkunde leyɗeele aduna kala ne, ko o faaro Fulɓe dunyaaru ne, sabu ɓeen ne ene ndaardamo ko o ɓiyngel mum en sabu makko wonde ƴiiƴam mum en, yiyooɓe he makko wonnde ko o lomtiiɗo Fulɓe kala he ngal kawrital leñɗi adunaaru.