Binndi Pulaar

Big weltaare ko innde fijiyanke naɓoka (acteur de cinéma) kadi magiyanke (artist comedien) ceedtanaaɗo mbaawka gila ine famɗi. Aamadu Muusaa Bah, ko ɗuum woni innde makko tigiri, haysinno omo nootoroo kadi he innde Mamma, jibinaa ko to leegal Madiina Gunaas he nder falnde geejawaay, diiwal Ndakaaru laamorgo leydi Senegaal.

Yeeɓiyankooɓe naɓoka (cinéma) Senegaalnaaɓe walla mbiyen nii adunaaru kala fuɗɗiima heɓtinde dokke Allah cuuɗiiɗe he ngel cukayel gila he law no feewi. Alaa ko haɗata noon nde tawnoo o muynu. Aamadu ko ɓiy Sokna Bah, lollirɗo Bojel he nder magoji Demmba e Bojel walla nii gila e “Ceerno Demmba” mago ngo o waɗdu noo e Haadii Gaajo, addungo tuufeere mum walla nii mbiyen mahngo ɓalal timmungal e ɓamtaare mago he ɗemngal Pulaar.

He 1998, taw Mamma ene yahra tan he duuɓi jeeɗiɗi ko ndeen naɓokayanke Leyla Sih heɓtini e makko wonde jom dokke e talent, so en kaalii tuubankoore. Oon ƴettimo ngam yo o fij e filam mum “Juumre Cukaaku”. Haysinno Mamma fiji heen ko rol tokooso ne, golle makko gonii maantiɗe kadi kollirɗe fijo naɓoka ko huunde fesaande makko nde o jibdina. Ko caggal ɗuum, he nder hitaande 2002, naɓokayanke goɗɗo, Aamadu Coor, suɓiimo rokkimo rol dowrowo (acteur pricipal) he nder filma mum “Maayel”. Oon filma addaniimo ɓeydaade naatde e soɗaade he nguurndam naɓokayaagal, magiyankaagal; ɗannaade e yiyde e ɓeydaade faamde oon aduna naɓokayaagal e humpitaade nder mum e boowal mum. Sikke alaa ne kay, wonaniimo jaŋde e ɓeydaade fannaade e faggitaade karallaagal ngaal meccal ngal o tawri neene makko, kono kadi ngal, kanko e hoore mekko, yiɗi nawde e daraja ɓurɗo toowde.

Aamadu Janngii ekkol, o janngii Quraana

Hayso Aamadu fuɗɗiima naɓoka e mago gila ko sukayel ne, ɗuum firtaani jibnaaɓe makko ene mbelsindinoo nehdi e jaŋde makko. Hono no kala ɓiy Pullo, juulɗo ni, Aamadu naatnaama alwul Quraana saanga nde yonti janngude. Ko noon ne kadi o naatniraa ekkol, kadi o duumiima he ɗiɗi ɗii kala haa o mawni. Gollaade-mo e yiɗde makko meccal makko magiyanke addanaani jibnaaɓe makko woppude-mo yoo o welsindoo jaŋde ndee nde tawnoo ɓeen ko jooma en pinal kadi gollanooɓe ɓamtaare pinal, annduɓe waawi ɓamtude pinal ko ganndal, kadi ko jaŋde woni coktirɗe ganndal. To bannge ekkol o janngii haa tolno tataɓo jaŋde hakkundeere (3^em).

Suka Mawnii fanniima

He 2011 Aamadu arti he big screen, caggal nde o ɓeydii he karallaagal. Nde tawnoo wonde magiyanke ko dokke Allah, kono kala meccel ene laaɓndii jaŋde, karallaagal e fannaade. He oon tuma tawi ko o fuɗɗiima faggitaade karallaagal naɓoka (cinéma) e teknikaaji fijo mum. Ko ndeen kadi naɓokayanke goɗɗo, Daawuuda Idi Jaawara suɓiimo rokkimo rol dowrowo filma mum “Ruer dans les Brancards”. Ko he ndeen hitaande kadi o yalti he filma Alain Gomis “Aujourdhui” kadi he filma Muusa Tuure “La Pirogue”.

Tuggude 2012 haa nder 2015 Aamadu Big Weltaare wuuratnoo ko to leydi Arabi Sawdiyya, kadi o huwtoriima oon fartaŋŋe ngam waɗde hijjoore makko, o wanngiima suudu Kaaba o juuri yanaande Nelaaɗo Allah (Sallallaahu alayhi wa Sallama).

Ko caggal ɗuum he 2015, nde o arti, o felliti hankade soobaade he nguurndam naɓokayankaagal e magiyankaagal, Pulaar e Wolof fof. O woni magiyanke dowrowo (acteur principal) he nder mago-doge, “Xale Xaalis” ko jiidaa kadi seriiji Pulaar goɗɗi keewɗi.

Ko he lewru Juko (Aout) 2017 Aamadu felliti ɓeydaade yaajnaade e fanniyankaagal mum, he ndeen hitaande kanko e Magiyanke ŋanaa o, Yero Soh, ɓe puɗɗi waɗdude jeewte he nder tele privée gadano he nder Senegaal o, woni 2STV, he yeewtere wiyeteende “Hayo”. Ɓooytaani sabu talent makko mo hay gooto waawaa yeddude hankadi e wonde mo karallo he banngeeji keewɗi saabii, juɓɓinatnooɗo mago-doge (serie) lolluɗo o: DIKON dogatnooɗo he nder Sen TV, yooɗaa golle makko noddimo yo o ar o tawta diɗɗal mum en, Dikon et compagnie, o magii heen he nder doge tati (rogere 151,152 e 153).

Caggal nde yimɓe fof njaɓi qirlii talent makko, Aamadu ne seeraani e weltinde yiɗɓe mum e yeeɓooɓe mum, ɗuum woni fansuuji makko. Role paayodinɗo kadi teskinɗo mo o fiji he nder filma “Mbaku” mo Serif Ace Faati, ene hollira fanniyankaagal makko kadi e pellital makko he kala sahaa ɓeydaade wuurnude meccal makko. Ko ngaal pellital e karallaagal jaɓde waawde huunde kala he nder art, rokkimo hoolaare Ummu Sih hettiyanke ŋana mo hay gooto hannde majjaani he nder aduna o he ngaal ɗoon meccal, haa o waɗani ɗum ñaaƴo (défilé) to Palais de la République, he yeeso hooreejo leydi o e jooma suudu mum, kadi e ñaaƴo woɗngo to King Fahad Palace.

Aamadu kadi ene jeyanoo e magatooɓe seri “Demmba e Bojel” dogatnooɗo to 2STV. Kono kadi omo magotonoo he seriiji Pulaar keewɗi ko wayno “Jamfa Gilli” e “Arɗo e Jeyla” eko nanandi heen.

Eɓɓo ɓurngo mawnude ngo Aamadu Muusa Bah lollirɗo Big Waltaare huccani oo ɗoo sahaa, ko gollondiral hakkunde makko e miñi makko Dji Barkham. Ko eɓɓo mawngo hakkunde Dji Barkham Production e Big Weltaare TV ngam ƴellitde naɓoka (cinéma) Pulaar to the next level,hono no Engele wiyata nii. Ɗuum woni nawde naɓoka Pulaar he tolno mo ngannduɗaa wonaa Fulɓe tan njeeɓata ɗum kono kala ɗo neɗɗo woni he aduna hee aɗa waawi yeeɓde ɗum mbeltoɗaa kadi njiytoɗaa heen hoore ma. “Hol ko haɗata ɗum waawde wonde?” Dji Barkham laabndii, “Eɗana njeeɓa ñalnde kala filmaaji he ɗemɗe ɗe en nanataa, kono nde wonno ene firtee eɗen mbaawi faamde ko haalatee koo, kadi ene wela en.” Huunde ndee laaɓndii ko karallaagal, pellital, ngalu, te ɗiɗi gadane ɗee Big Weltaare e Dji Barkha ene njogii ɗum, heddii ko ngalu ngu, ɗuum ne so Fulɓe njaɓii waɗde heen ene njogii.

Ko adii nde ɗiin eɓɓooji laatatoo, Big Weltaare ene hokka en Rendez vous he seri “Zeydi le Fils du Khalif” he jolal mum 2, ɗo o jogori magaade rol paayodinɗo tawa ko he nder Big Weltaare TV.