Binndi Pulaar

Caggal nde udditii he nder Canal +, ñalnde 29 Mbooy, e jammaaji mawnin’gol ngool udditgol to Nuwaasoot, Bamako e Konaakiri ñalnde 30 Mbooy, ayaawo PULAAGU mawninii kadi hannde Dewo-hoorebiir 4 Seeɗto, to Grand Theatre mo Ndakaaru, udditgol oon ayaawo keblanaaɗo ngam pinal Fulɓe e ɗemngal Pulaar. Ɗuum waɗaa ko he tawtoreede naalankooɓe Fulɓe heewɓe e magiyankooɓe he ɗemngal Pulaar, yantude e yontaaɓe, ngenndiyankooɓe e hatanteeɓe leñol Fulɓe.

Fulɓe ɓee fof hannde ene njogii weltaare mawnde he jibineede ngoon ayaawo walla mbiyen kanaal, sabu njoortooji mawɗi ɗi ɓe njogii he makko, tawi saabii ɗum ko adii fof ko wonde Fulɓe ɓooyii hooɗeede ko way nii sabu mum en ɗaweede he ayaawooji walla kabrirɗe leyɗeele ɗe ɓe njeyaa ɗe. Geɗel goɗngel ngel ko umminɓe eɓɓoore ndee e koye mum en, woni Canal+. Ko fanniyankooɓe dowrowɓe, jooma en karallaagal toowngal he kala ko fayti he natehitowol (audiovisuel), ɓe ene njeyaa e ɓurɓe seedtaneede heen baawal e karallaagal he nder adunaaru he, teeŋti kadi he nder jookdu Afrik.

Kanaal ngal, ene Jibi Ooldu Bah gardiiɗo eɓɓoore ndee o habriri ni, ko hollirde magooji-doge Pulaar e kilipaaji naalankooɓe yimooɓe he ɗemngal Pulaar. PULAAGU, hono kanaal ngal inniraa nii, ari ko yeewtude Fulɓe kala haalooɓe Pulaar walla boom weltortooɓe pinal Fulɓe.

Gaagaa jammaaji e kiirɗeeli mawningol udditgol kanaal ngal he nokkuuji ɗi kaalɗen dow ɗii, kanko Jibi Ooldu Bah, gardiiɗo eɓɓoore ndee o, o wanngiima kadi he kala kabrirɗe e ayaawooji ɗo Pulaar haaletee, teeŋti he nder Senegaal, ngam ɓannginde udditegol ngaal kanaal Pulaagu. O yettiima heen ko wayno kanaal itv, Radio Tele Fulɓe, Piindi tv e Big Weltaare tv, hayso innii ɗiiɗoo tan. O famminii ko woni fayndaare eɓɓoore ndee, hol nde miijo ngoo fuɗɗii ɓulandemo, hol ko haɗnoo ɗum laataade gila ndeen, e hol jogori wonde kuccam kanaal ngal, e hol njoortooji Canal + ne jogii e naatgol mum he ngooɗo eɓɓo.

Ƴellitde ɗemngal Pulaar e pinal mum, kono kadi ko eɓɓannde faggudiyankoore.

Jibi Ooldu hollitii wonnde hayso tawii kanko ko o pullo jiɗɗo pinal Fulɓe, kadi jinnganoowo ɗemngal Pulaar ne, Canal + kanum waawaa jaɓde ƴettude eɓɓannde nde sooynaaki heen ngartam, nde tawnoo ko ɓe julankooɓe ɓe ngannduɗaa kala ɗo naatni juuɗe mum en, ko tawat e ɓe ɗaminii heen ngartam e tonaari (benefice). Ko ɗuum saabii, so en paami, leeltugol siinunoode nde eɓɓaande gila nde o addi ɗum toon adan. So en tuugniima he haala makko, he nder kanaaluuji walla jeewte Pulaar ɗe o bismaa ɗee, o wiy ko nde o addi eɓɓoore nde to Canal+, ɓe ngannduɗaa ko kanum en tigi o gollantoo, ɓeen mbiy-mo tan ko eɓɓannde nde ene yuɓɓi, kono he ɗo humpito mum en e wiɗtooji mum en tolnii, Pulaar alaa ndaarooɓe (audience), ɗuum firti ko so kanaal waɗaama tawa haalata tan ko he ɗemngal Pulaar, ngaal kanaal waawataa wuurnude hoore mum saka waawa yaltinde tonaari. Ko ndeen o wiy, o hollitiɓe miijo SUNU YEUF, kanaal magooji he ɗemngal Jolfe (Wolof) he nder Canal+.

Ballal Youtube he addude ndaarannde hesere he magooji Pulaar.

Fulɓe ko leñol mawngol, jaajngol he nder joogdu Afrik, kono kadi caringol. Ndeen saraare hayso ko ɗum ngalu mawngu wonande leñol ngol ne, won ɗo ɗum jibini aayaare e lohre leñol Fulɓe e ɗemngal Pulaar. Gaagaa wonde ɗum sabaabu haa ɗemngal ngal heewi calte, haa heen sahaaji joom mum en ene ɗeɓa leelde faamondirde, ko wonde kadi Fulɓe famɗitde he nokkuuji ɗi ɓe njeyaa hannde ɗi fof, haa ɗemɗe goɗɗe tokoose mbaawde jiimtude he dow maɓɓe mbaawi yooldeɓe walla kam mbiyen mbaawi wirnudeɓe, tawi kadi ko ɗemɗe so ɓe njerondiraama e mum en he keewal, won heen ngonataa hay sappo he ndir teemedere Fulɓe he nder adunaaru he. So en ƴetti tan yeru Wolof he nder Senegaal, en mbiyaama kanum ene waawi waɗaneede kanal mum SUNU YEUF sabu ene jogii yeeɓooɓe kono Pulaar kanum waawaa sabu alaa yeeɓooɓe, waɗi noon ko saraare jibinnde lohre.

Ƴellitagol karalleeje kese, internet e jibineede layti renndo e Yutube addii wellitaare hesere to bannge ayaawo e kumpitirɗe, tawi kadi ko he mbaydi potal ko aldaa e heedi-heeda. Naalankooɓe Fulɓe e magiyankooɓe he ɗemngal Pulaar, njaɓɓiima oon fartaŋŋe kadi ɓe kuwtorii ɗum ngam waawde waɗde ko ɓe ndonkunoo gila ko ɓooyi, ɗuum woni ayaawooji e kaalirɗe ɗo ɓe mbaawi hollirde karallaagal e ñeeñal maɓɓe, kono kadi ŋari pinal Fulɓe e galɗugol ɗemngal Pulaar.

Kanaaluuji youtube keewɗi cosa ngam hollirde pinal Fulɓe e ƴellitde ɗemngal Pulaar, rewrude he waɗde jeewte pinal, loowdi e humpito, kono kadi yaltinde magooji he ɗemngal Pulaar e naalankooɓe yimooɓe he ɗemngal Pulaar.

Ko he ɗuum jibinaa kanaaluuji bayɗi hono no Tele Fulɓe, Tele Men, Piindi TV, Foutavision, Big Weltaare TV, Fulbe production, caggal mum Fuul TV, Hoodere Pulaagu Media, e goɗɗi ɗi en mbaawa limtidde. Gooto heen kala holliri karallaagal mawngal e talenji aktoreeɓe Fulɓe e magiyankooɓe Haalpulaar en. Kono kadi yimɓe ɓee ne njaɓɓiimaa ɗiin kanaaluuji e golle mum en. Kolliri yiɗde mum en, weltaare mum en he holleede ko njeyani koye mum en, pinal mum en he nder ɗemngal mum en. Kanaal heen fof dañi ko ene ɓura teemedere unjunere waɗɓe abone he nder dumunna daɓɓo. Kadi heen kanaal so yaltinii mago, ene daña hakke ujunnaaje teemedde limti-limtinɗe yeeɓooɓe ɗum he nder ñalawma gooto walla he nder yontere wootere. Ɗiin doneeji, e ɗeeɗoo limanɗe addanii Jibi Ooldu waawde ruttade he Canal + wiy ɗum en, ndaaree seedantaagal nani, wonnde Fulɓe ene keewi ene carii he nder Afrik fof ɗuum kam wonaa ko yeddondirtee, kono kadi ɗeeɗoo limooje ene kollira eɓe njiɗi ɗemngal maɓɓe e pinal maɓɓe, kadi so ɓe kollaama pinal maɓɓe he nder ɗemngal maɓɓe tan ɓe ndaarat. He ngol maa taw Canal + yiylaaki hujja kono jaɓi ƴettude eɓɓaande nde.

Bojji Haame e Faayre ko dooɓaa

Hono no mbiyɗen dow too ni, Canal + wonaa fedde baarajaagal walla waɗirooɓe Allah; wonaa fedde ngenndiyankooɓe rentuɓe ngam ɓamtude pinal Fulɓe, kono ko ɓe julankooɓe yiylotooɓe tonaari he kala ɗo ɓe naatni ngalu maɓɓe, no Engele wiyata ni, ko ɓe business ɓe ngonaa charitable organisation. Ko ɗuum waɗi kala ko eɓe eɓɓa maa fawoo he dow feere nde ene jibinanɓe ngartam.

Nde eɓɓoore ngal ɗoo kanaal PULAAGU woni he laawol e peeje ndee, porodiktoor en Fulɓe heewɓe ene njoginoo ɗamaamuya wonnde so sahaa o yontii, ɓaawo-dee ko kanum en ngonnoo he dingiral hee ene mbadda e magooji Pulaar yana-ummo; alli yoo alla, ha ndaña ko njaltiniri seriiji mum en, so doole ɗee ngarii ko he juuɗe mum en fawatee. Kono hay haame, ko fuɗɗii yiyeede ko wonaa noon yahri. Sabu CANAL + waɗdi junngo he faandu ko e Maroodi TV, hayso tawii noon Jibi Ooldu wiy wonnde ɓe ƴettii katolokaaji porodiktoor en Haalpulaar en woɗɓe heewɓe, ɓeɓe nanondiri he luwde filmaaji mum en e yaltinde ɗum en he nder kanaal PULAAGU, kono ɓe paamondiri e ɓe totta ɗum en ngalu ngam njuɓɓinanaɓe magooji Pulaar ko Massammba Nduur mo Maroodi TV. Tawi saabi ɗum ko ɓeen ɓuri jogaade doole e karallaagal, hayso tawii noon, magooji ɗii kam fijata ɗum en ko magiyankooɓe Haalpulaar en.

Faayre ndee ko wiyde ene jeyaa e eɓɓoore Canal+ wonnde fawataa magooji Pulaar baɗaaɗi he nder nokkuuji teeru walla galleeji jooɗɗi ciŋkaaɗi. Fawata tan ko magooji baɗaaɗi he dowri, kollirooji ladde, cuuɗi tibaaji e galleeji kooce. He biyɗe Jibi Ooldu, miijo waɗde ɗuum ko eɓe njooɗtorii so ɓe mbaɗtii fawde seriiji Fulɓe kollirooje nguurndam saareyeejam e ciŋkal mum, hono no seriiji Wolof ɗii ni, ndeen Fulɓe ɓee nattat yeeɓde SUNU YEUF woni filmaaji Jolfuɓe ɗi. Ɗuum firtata ko Canal+ ene yiɗi hoɗnude he nder hakkillaaji yimɓe pine ɗiɗi Senegaalnaaɓe ceertuɗe. Pinal Jolfuɓe saareyeewal, jahdungal e ƴellitaare, kuwtortoongal karalleeje kese e koɗorɗe ciŋkaaɗe, nguurndam mbelɗam neemiɗam; to oya bannge pinal Fulɓe, dowriyankeewal, keddingal e joote, baasal e niɓɓere. So ngoon miijo siyii, ma en mbiy kala ko CANAL + ɓeydani ɗemngal Pulaar ko ɓe njogri bonnande Fulɓe ko wappittoo ɗum ɗo woɗɗi. Mbele so ɓe caliima dognude seriiji Pulaar kollirooji nguurndam saareyeejam e kanal mo ɓe njeyani koye maɓɓe so Pullo waɗii kanaal mum ene fawa heen seriiji Pulaar saarenkeeji, yeru Piindi TV walla Fuul TV wiyii yo ɓe naatnan ɗum kanaal mum he nder bukee maɓɓe ma ɓe njaɓ? So ɗuum alaa, salaade Canal + fawde seriiji Pulaar sabu tan mbaɗaa ko he nder gure tappamaaje e ciŋkule jooɗɗe wona yiɗde faddaade ɓamtaare magooji Pulaar? Ko laaɓndal.