Binndi Pulaar

Rawane nde mago-doge Zaydi le Fils du Khalif fuɗɗii dogde he nder Piindi TV waɗii iiñcuru mawndu he nder renndo Fulɓe teeŋti noon e yeeɓiyankooɓe  magooji Pulaar.  Heewɓe kadi e  rewindiiɓe ƴellitaare mago he ɗemngal Pulaar, ene taƴnii wonnde Le  Fils du Khalif, addii kesem-hesaagu  e jaɓɓal kesal he nder mago Pulaar..

Zaydi karakteer o

Zaydi aktoor dowrowo mago ngoo o ko ɓiy ceernaajo ganndaaɗo, kiliifa ittanaaɗo giɗal he renndo Senegaalnaaɓe kala. He nder ngoon renndo ɗo ceernaajo wonaa tan jannginoowo defte e ganndal diine, juulnoowo jamaaji, anndina hol no Allah rewretee. Kono he renndo Senegaalnaaɓe ceerno ko joom sirluuji alliyankooji, gannduɗo mbirniindi, kadi baawɗo waylude hoddiro. Ceerno ko joortoraaɗo waawde duwanaade almuuɗɓe mum haa ndaña udditaare ngalu keewngu, golle toowɗe, haa oon tigi resa walla resee belngal; ceerno ko baawɗo wallude almuudo mum haa waawa tonaade he kawgel (gañaade iksamee), kono kadi ceerno ko joortoraaɗo waawde falaade hoddiro Allah, itta moƴƴere nde Allah rokkunoo neɗɗo o lomtina ɗoon bonannde. Yeru: Omo waawi waasnude galo, o haangɗina ƴoƴɗo walla o bonna dewgal hakkunde yiɗondirnooɓe weldunooɓe. Kono ɓuri joorteede e khalifaaɓe mawɓe ɓee ko wayno baaba mum Zaydi en, ko hay yiɗdeɓe e nafdeɓe tan ene addanmaa dañde barke aduna e laakara.

  Zaydi nehanooma e wonde ceerno, o jannginaama kadi o rokkaama sirluuji e ganndal mbirniindi. Ene jooɗtoraa ko kanko jogori rontude baaba makko e jooɗtaade he jappeere mum janngo so oon yiyaaka. Kono  Zaydi  kanum yaɓɓi ko felo woɗngo, o suɓii ko laawol goɗngol nguurndam. E peeñɗi,  Zaydi ko neɗɗo peewɗo, nehiiɗo nehdi almudaagal. Omo hollira jikkuuji joortaaɗi he ɓiy ceerno no foti siforaade, kono he jaati  Zaydi ko jeeyoowo dorog, modduɗo he warhoore. Omo yiɗi kadi huwtoraade teddungal e hurum baaba makko e jokkondire mum ngam yoo ñaawooɓe ɓee njaɓɓu e losko hee ubba haala kaa warngo ngoo deƴƴee.

Ko maayi ene jibina ko wuuri

He tuma ɗo  Zaydi woni he caɗeele waɗbonaagu, omo waajtoo hoore makko, ɓernde makko ene yiɗi aaltademo e artirdemo he peewal, ko ndeen  o fotti e Leyla. Suka dewbo juulɗo, ceniiɗo, muurnotooɗo hijaab, kiilniiɗo jaŋde e dewal Allah e taragol defte diine, kono Baaba Demmba (Umar Akon Jah) baaba mum Leyla kanum wonaa neɗɗo peewɗo. O anndiraa he leegal he fof ko wonde jaroowo sanngara (konnjam) manndiloowo. Nde Leyla anndini  Zaydi ko Baaba Demmba woni baaba mum ndee Zaydi deŋƴii, jerminii ngam alla e bettere. He nder hojomaaji daɓɓi tawi ɓernde makko werliima hakkille makko laaɓndal, hol no Baaba Demmba waawi jibinirde o suka dewbo ceniiɗo? Kono hono no jagguɗo miijo makko ñohre nii, Leyla jaaboriimo mallol Pulaar: “ Ko maayi ene jibina ko wuuri”, suka dewbo o wiyimo. Nde Zaydi jerminii sabu mum nande ngool konngol, o jokkitani ɗum mallol ngol, :”Ko wuuri ne kay ene jibina ko maayi.”  Walla e konngol goɗngol Fulɓe ene mbiya ɓiyɗo artataa arat.

Loowdi

Hayso aada yahrunoo ko magooji Pulaar fof keewi haalde tan ko giɗli, dewgal, e ɗannungal ne, Le Fils du Khalif kanum woorii ngool laawol gila he fuɗɗoode walla kam mbiyen ngo jillii heen soɗo heso ngo woowaaka he nder loowdi magooji Pulaar. Mago ngoo soɗii ko he mbaydi filmaaji “Gangster” caltal he nder soɗo “crime genre” walla mbiyen soɗooji baɗtamboniigu. Sabu ene tawee he mago hee njeeygu dorog, warhoore, loskooji laamu, e hulɓinde (intimidation).

Toɓɓere ɓurnde teskinde noon woni jogaade mago ngoo cuusal joofaade toɓɓe gooreteeɗe (des sujets taboux) fuɗɗoraade gila he tiitoonde filma o, e jaɓde renndinde helmere ceerno e helmere dorog he nder yumre konngol wootere . Ko ɗoon kesamhesaagu nguu ɓuri teskinde. Nde tawnoo hayso ɗo mago ngoo yahrata ɗoo tawo ene saɗi anndude hol ko woni kuccam maggo e hol ɗo ngo tiindii, kono loowdi ndii ene joofii yeewtere pelɓondiral hakkunde banngeeji ɗiɗi e pinal Senegaalnaaɓe (Hiirnaange Afrik e kuuɓal). Heen bannge gooto ko pinal gaadenteewal goowangal ngal, tuugningal e diine, neɗɗaagal, e kulol Allah, walla mbiyen reende hurumaaji Geno, to bannge goɗɗo oo ko pinal teeru (cultures citadines) ngal ko ɓuri teeŋtinde ko wellitaare neɗɗo e jogaade ndimaagu suɓaade laawol nguurndam ngol yiɗi rewde hayso tawii ene anndi ngool laawol ene waawi yanndinoyde ɗum janngo he kasaara. Sabu jillondiral pine keewɗe ceertuɗe cewle, keɓeteengal he kawrital yimɓe iwruɓe he nokkuuji ceertuɗi pottiti he nder teeru waɗi, reende pinal mum ganniwal heddo heen ina saɗti walla mbiyen nii gasataa laataade. Hayso pine ŋellitiiɗe jibinooje ɓamtaare e ƴellitaare ngoka aadee he fannuuji keewɗi ene faggitee he nder teeru ne, pine bonɗe borjinooje kadi ene newii ko faggittee he nder teeru.

Hol to serie Le Fils du Khalif fayri ndee ɗoo yeewtere, e haa hol toon ngo suusi yettinde ñiŋoore maggo he renndo ngoo, e hol ko woni winndannde walla wasiya mo ngo waawi rokkude renndo ngoo? Ngool jaabawol ene sabbaa he doge maɓɓe payɗe arde.

 Ko waawi heen wonde kala, Dji (Jii) Barkham, juɓɓinɗo mago ngoo o ene fodani yeeɓooɓe mum ko mawni: “Min ngartiri ko jeewte (dialogues) keewɗe maana, magiyankooɓe waawɓe fanniiɓe, e nate jooɗɗe laaɓtuɗe.”

Magiyankooɓe mawɓe fanniiɓe sikke alaa ko ɗuum cooyniɗen he nder ngal jolal ɗiɗaɓal Le Fils du Khalif. Ko wayno Haadii Gaajo,magiyanke toowɗo ɓooyɗo dillude he magooji Pulaar, lollirɗo mago mum Ceerno Demmba walla magooji mum Demba e Bojel, kono kadi sukaaɓe magiyankooɓe ŋana ko wayno Aamadu Bah “Bullaay” walla Big Weltaare puɗɗiiɗo magaade he filmaaji dowrowi gila ko cukayel kadi kiranoowo ɗemngal Pulaar, addi ballal teskin ngal he ƴellitaare mago Pulaar, ene tawti magiyankooɓe serie o lasliɓe ɓe.

Yaltata ko to Big Weltaare TV

Ko hesɗi kadi ngol laawol ko mago “Le fils du Khalif”, he jolal 2 mum yaltata ko Big Weltaare TV wonaa Piindi TV to jolala 1 ngal dogatnoo to. Kono ko adii nde rogere adannde ndee yaltata, eɓe eɓɓi yuɓɓinde ñalawma tintinoore jolal 2 ngal to Centre Culturelle Blaise Senghor ñande 27 Juko (Aout) 2023. Ma ɓe kollir toon huunde e mago ngoo kadi e holno ngo fiiliraa. Ɗuum noon hoto mo luutaa.