Binndi Pulaar

Mooɓondiral 78 ^ɓal Yuɓɓo Kawtal Ngenndiiji (Organisation des Nations Unis) fuɗɗiima gila 18 lewru Silto, maa yah haa 26 lewru nduu to ñiiɓirde Kawtal ngal to New York, Dowlaaji Dentuɗi Amerik.Hitaande fof so nduuɗoo lewru arii hooreeɓe dowlaaji aduna o e dipolomat en ene kawritoyaa toon ngam yeewtidde he caɗeele ɓurɗe soklinde aduna o he ngaan saanga kadi ɓe mballondira e pewje ngam no ɗe cafriraa.

Nguun batu woni dowrowu to bannge lelnugol kuule yuɓɓo ngo. Leyɗeele 193 terɗe yuɓɓo ngoo, ngootiri heen fof ene jogii jojjannde he suɓngo (wooted) kadi ko kannje fof poti daaɗe he nder mooɓondiral he , he mbeñdi ɗo wonno Peŋngal Ndeenka e Kisal (Conseil de Sécurité).

Iwdi Sosngo

He 1945 caggal Wolde Winndereyankoore II gasi, leyɗeele keewɗe tawi ene pusi haa memi leydi gila e mahateeje mum en haa e faggudu mum en, woɗɓe boom ko ɓuri heewde e sagataaɓe mum en kalkinooma he ɗiin baasiiji. Tawi aduna oo fof ene tuuyaa jam e deeƴre. Yimɓe iwruɓe he leyɗeele 50 ngari kawriti to wuro San Francisco Kaliforñaa, DDA, tuggude ñalnde 25 Duujal (Avril) haa 26 Korse (Juin) ngam yeewtude he pewje ɗe ene kaɗa ko waynii waɗtude he nder adunaaru he. Fotde lewbi ko ɓe njooɗii he nder ɗiin batuuji e diisnondire, nanondiral jibinaa heen, woni Doosɗe Yuɓɓo Kawtal Ngenndiije(Charte des Nations Unis) ko he ɗuum yuɓɓo ngoo sosaa e ɗaminaade ma ngo waaw haɗde wolde waynde hono no ndeɓe njalti ndee waɗtude he aduna he.

Lewbi seeɗa caggal nde ngaal doosgal (walla diiñorde) nanondiraa, Yuɓɓo Kawtal Ngenndiiji fuɗɗii woodde he ñalnde 24 Yarkomaa 1945. Leyɗeele keewɗe ciifi ngaal nanondiral, ene jeyaa heen Siin (Chine) Farayse, Dental Sowiyatik, Laamanteeri Ndentundi (Royaum Uni) Dowlaaji Dentuɗi Amerik e leyɗeele keewɗe jeyanooɗe he nanondiral doosɗe ɗee.

Nde Kawtal ngal sosaa ɓe mbaɗii calɗi joy dowrowi tammbiiɗi njuɓɓudi ndii, ko kanum en ngoni jogiiɗi njiilgu kawtal ngal. Ma en noddirɗum peŋɗe (hayso tawii ɗum woowi noddireede ko batuuji- Conseil), nde tawnoo ene he nder mum cate e goomuuji karalleeji. Ɗeen peŋɗe ngoni “Mooɓondiral” ngal ngannduɗaa ko batu kuuɓtodinɗo terɗe (leyɗeele) Kawtal ngal, ko he mum nanondire ɗee e kuule ƴettatee. Peŋngal Ndeenka e Kisal, Peŋngal Renndo e Faggudu, Peŋngal Ndesndateeri (Conseil de Tutelle), ko kanum halfinanoo fiyakuuj leyɗeele keewɗe ɗe cuwaano heɓde ndimaagu mum en dawrugol (jeytaare), Ñaawirde Adunayankoore, e Hoolaare Kuuɓal Kawtal Ngenndiiji (Secrétariat des Nations Unies) ko kanum jogii njiilgu kuuɓtidingu yuɓɓo ngoo, woni koolaaɗo kuuɓal hannde ko António Guterres (Antooño Gutares) jeyaaɗo Purtugaal.

Peŋngal Ndeenka e Kisal Yuɓɓo Kawtal Ngenndiiji

Ɓaawo dey, en mbiy jeynoo sabaabu YKNg soseede ko mbele haa kisal dañee he adunaaru he kala, ene haani ɗeen pewje njeyee e gadiiɗe daɗɗeede he nder yuɓɓo adunaaru heso ngoo. Ko ɗuum jey tafeede Peŋngal Ndeenka e Kisal (Conseil de sécurité des nations unis) cosangal ñalnde 17 Siilo 1946. Darnde maggal ko tabitinde deeƴre e kisal he nder aduna he. Peŋngal ngal ene waɗi terɗe (leyɗeele) sappo e joy. Heen joy ko diiñiiɗe ndirtataa, ɗeen ngoni Siin (Chine) Farayse, Dental Sowiyatik( Jooni ko Risi) , Laamanteeri Ndentundi (Royaum Uni) Dowlaaji Dentuɗi Amerik, sappo keddiiɗe ɗee ko taƴanteeɗe happu so gasii ko lomteteeɗe. Denndaangal leyɗeele jeyaaɗe he yuɓɓo ngoo, so ngaal peŋngal nanondirii he feere, ko alaa e sago, ɓe njowoo he ngaal nanondiral walla ngaal pellital. Kono leyɗeele joy ɗe kaalɗen dow ɗee, gaagaa wonde ɗe ɓaafniiɗe ɗe ndirtataa, eɗe njogii kadi ko wiyetee “Jojjannde walla kattanɗe salaade” (droit de veto walla he Engele veto power). Ɗuum firti, hayso tawii sappo e joy tergal peŋngal heen sappo e nay nanondirii he dow huunde ngootiri e joyɗii ene waawi salaade, haɗa ɗum ɓennude.

Baɗal garwaniiwal ngoon yuɓɓo waawi gollude so yiyii huunde ko waawi jibinde fitina e wolde hakkunde leyɗeele walla nii he nder leydi, ko wasiyaade waddooɓe ɓee nde njeewtiɗta e koye mum en tawa ko he mbaydi jamyamri, mbele ene mbaawa nanondirde he dow deeƴre. Peŋngal ene waawi yamirde dartin’gol jeynge (cessez le feu) neldude maageeji-bulaaji (kooninkooɓe jam), hiiɗaare faggudu, walla nii uddo njulaagu (ammbargoo).

Dipolomasii ngam reende deeƴre e kisal

Hayso peewje kaalɗen dow ɗee ko ɗe yuɓɓo ngoo waawi huwtoraade ne, lawbi keewɗi ene ngoodi gadoteeɗi reweede kadi ɓurɗi moƴƴude ngam waawde faddaade baasal e tiiɗallaaji e lor dañateeɗo so wolde huɓɓi, ɗuum woni waɗde feere boom mbele maa wolde waas huɓɓude.

Koolaaɗo Kuuɓal Kawtal Ngenndiiji ene jogii nelaaɓe mum heerriiɓe e diisnondirɓe mum he nokkuuji keewɗi he nder aduna he. Ngam ñifde fitina gila suwaa ɓurde juuɗe, YKNg ene huwtoroo dipolomasii ngam haɗde hareeji, tawa ko ɓeen nelaaɓe heeriiɓe walla diisnondirɓe ndogata he moƴƴere mbele jam e nanondiral ene waɗa ko adii nde jeyli ene kuɓɓa heddoo fewre no ñifiraa ene yiyle.

Ko biro Hiirnaange Afrik ngam falaade hareeji jooɗiingo Ndakaaru, Senegaal, adii wonde biro diiwanyankeewo ngam faddaade hareeji ngo Kawtal Dowlaaji sosi. Sabaabu goodal maggo ko ngam ɓeydaade wallude Kawtal Ngenndiiji waawde addude pewje ngam reende jam e kisal he diiwaan Hiirnaage Afrik. Hannde ngo naattinaama he njiimaande yuɓɓo nelaaɗo keeriiɗo ngam diiwal Saahal (Bureau de l’Envoyé Spécial pour le Sahel) wontii yuɓɓo wooto.

Caɗeele waasde potal he Peŋngal Ndeenka e Kisal

Hayso tawii soseede Yuɓɓo Kawtal Ngenndiije walli no feewi he ɓattondiral hakkunde leyɗeele, sabu mum wonde yuɓɓo newnungo kaaldigal e fewjidde hakkunde leyɗeele aduna ɗee. Walli e reende ndimaagu leyɗeele tokoose doofolle e waawde woodde e jogaade ndimaagu mum en dawrugol ne, heewɓe hannde ngoya wonnde yuɓɓo ngoo natti yahdude e jamaanu, teeŋti e no peŋngal ndeenka e kisal ngal sañorii nii. Woni leyɗeele joy tan jogaade mbaawka walla jojjannde, ngootiri heen fof waawde, kanum tan salaade, toɓɓere nde keeweendi ndii fof nanondiri haɗa ɗum ɓennude.

YKNg Kuwtorogal doolnuɓe he dow doofolɓe

Ene jeyaa e biskitooɓe YKNg wiyooɓe yuɓɓo ngoo hannde wonaani so wonaa kuwtorogal leyɗeele joy diiñiiɗe ɗee ngam fawde pewje mum en he dow leyɗeele keddiiɗe ɗe, walla faddaade yuɓɓo ngoo ƴettude pewje duŋtondirɗe e ko woni intere majje. Ɗeen leyɗeele doolnuɗe ene pewja peeje mum en, lelna kuule mum he nder pelle goɗɗe ko wayno l’OTAN haa nanondira toon ngadda ɗum to YKNg ngam laawɗinde ɗum he dow heddiiɓe ɓee. Mbele so haala waɗii janngo ɓe kolla aduna o ɓe mbiya nani ɗum ko kuule nanondiraaɗe to Kawtal Ngenndiiji.

So en teskiima, leyɗeele joy ɗee fof so wonaa Siin ko leyɗeele tuubakooɓe, Orop e Amerik. Ko ɗuum waɗi leyɗeele Worgo (Sud) ɗee kala ene nodda he no mbayliigu waawi waɗireede tawa huunde ndee ene ɓura waɗde potal. Won wiyooɓe yoo terɗe diiñiiɗe ɗee ɓeydo yaajneede mbela diiwaan kala he jookli he ene daña jooɗaniiɓe ɗum en toon. Ɓeen jogiiɓe ndeen yiyannde ene nodda yoo leyɗeele bayɗe no Indu, Japon, Afrik du Sud, e Beresil ɓeyde he nder terɗe peŋngal he, kono won yiyɓe ɗuum e hoore mum ɓeydata tan ko koye piilaaɗe meeteleeji, kono addataa potal. Goonga oo tan ko jojjannde salaade nde leyɗeele joy ɗee ndokkaa ndee ene foti nattude, kono eɗen nganndi ɗuum weeɓataa. Nde tawnoo ko maa kamɓe ɓe njaɓa ɗuum kadi ɓe kawra ɓe ngoota yoo ngun mbayliigu waɗ. Eɗen nganndi noon hay gooto tamnetaake jogaade konngol aduna fof woppa heɓtee e junngu mum.

Hade nguun mbayliigu dañeede, hitaande fof maa laamɓe aduna oo njkku hawroyde to New York, ɗo laamɓe doofolɓe ɓee ndañata fartaŋŋe fonndondirde balabe mum en e laamɓe semmbolinɓe ɓee , so ɓeen kaali ɓe njaabo. Heen sahaaji boom ɓe tonndira ɗum en, ɓe mbiskita golle mum en e pewje mum en dawrugol. So gasii huunde heen fof ruttoo ɗo wonno.